"Қувғиндаги ўзбек ижодкорлари уюшмаси" деб номланган бу ташкилот Ўзбекистондан турли йилларда турли ижтимоий ва сиёсий сабабларга кўра қочиб чиқишга мажбур бўлган ижодкорлар: ёзувчилар, шоирлар, журналистлар, рассомлар, санъаткорлар, олимлар, илмий изланувчилар ва жамийки ижод билан шуғулланувчи кишиларни дунё бўйича бирлаштиришни ўз олдига мақсад қилиб олган.

Уюшма бундан ташқари ўзбек ижодкорларини ҳамкорлигини ташкил қилади,уларни асарларини турли жаҳон тилларига таржима қилиш, чоп этиш ва тарғиб қилишга кўмаклашади, турли адабий, бадиий кўргазмалар ташкил этади, туркий халқлар ижодини ўрганувчи илмий текшириш марказлари, университетлар, халқаро Ёзувчилар Парламенти ва Пен клублар билан ҳамкорликда иш олиб боради, ўзбек адиблари ПЕН клубини ташкил қилади, турли жойларда ўзбек ижодкорлари билан учрашувлар уюштиради, ўзбек ижодкоралари ҳаёти ва ижоди билан боғлиқ ҳужжатли филмлар ишлайди, чет эл ўзбек адабиёти антологиясини ташкил килади.

Қувғиндаги ўзбек ижодкорлари Уюшмасига , айни пайтда Германияда яшаётган туркшунос олим, тарих фанлари доктори Боймирза Ҳайит, Ўзбекистондан машҳур ҳофиз ва шоир Дадахон Ҳасанов, Норвегиядан сиёсий бошпана олган таниқли шоир Муҳаммад Солиҳ, Туркиялик профессор, тилшунос олим Темур Хўжа ўғли, Бишкекдан шоир, Ўзбекистон Ёзувчилар Уюшмасининг аъзоси Холдор Вулқон, Тожикистонлик журналист ва шоир Мирза Ҳаким, АҚШдан социолог Баҳодир Файзи, Швецарияда яшаётган адиба Қурбаной Камол қизи ва бошқа кишилар биринчилардан бўлиб аъзо бўлиб кирганлар ва ташкилотни қўллаб қувватлашларини билдирганлар.

Янги ташкил этилаётган ташиклотга аъзо бўлиб кириш ва уни қўллаб қувватлашни истаганлар ташкилий қумита аъзоларига ёки бевосита Уюшманинг интернетдаги саҳифасига (Jadid@list.ru) мурожаат қилишлари тавсия этилади.

Беҳруз, "Исёнкор" мухбири.